LEGAZPI CITY – May pigklaro an Public Safety Office (PSO) Legazpi manungod sa mga deputized enforcers kan gobyerno-probinsyal.
Sa intrevista kan Brigada News FM Legazpi kay PSO Chief Ret. Col. Rolly Esguerra, pigklaro kaini na wara siyang sinabi na dai siya uyon sa pagkakaigwa nin komisyon kan mga deputized enforcers.
Segun saiya, bako man ini isyu asin habo niyang ma-misinterpret siya kan publiko. Siring man, wara man su boot nin komento an lokal na gobyerno kan syudad huli ta karapatan man ini kan gobyerno-probinsyal.
Alagad, kaipuhan sana kaya na maimpormaran sinda sa pormal na paagi. Dawa kaya an gobyerno-probinsyal an nag-deputize sa sainda, importante man giraray an courtesy sa lokal na gobyerno sa paagi nin surat na may kinaraman sa saindang operasyon.
Alagad, sinabi ni Esguerra, wara man ki problema mapadapit digdi asin wara ki dapat pag-orolayan.
Mientrastanto, pighayag man ni Esguerra, sa parte kan saindang opisina, padagos man giraray an saindang mga lakdang siring kan pagdadarakop sa mga pasaway na drivers, wheelclamping asin iba pa.