GIDAKOP sa kapulisan ang usa ka Public school teacher sa GenSan human gireklamo sa usa ka minor de edad sa pagpanghadlok nga i-post sa social media ang hubo nga hulagway kung dili mosugot sa gustong mahitabo sa magtutudlo.
Subay sa talaan sa presento uno Hunyo 16, 2021 alas dos sa hapon gihimo ang entrapment operation sa dalang Narangita sakop sa Barangay South batok kay Sherwin Paraiso, 25- anyos, ulitawo, usa ka public school teacher nagpuyo sa Purok Malok, Brgy. Labangal.
Alas dose sa udto nipatim-aw sa kapulisan ang reklamante nga 17 -anyos nga si alias Rona, nagpatabang kay gibaharan daw kini sa magtutudlo nga i- post sa social media ang hubo nga mga hulagway niini sa Online Landian Community kon dili makipag-sex.
Gumikan niini ang taga Cybercrime unit sa pagpanguna ni PCol. Junny Buenacosa nakig-alayon sa Pendatuon Police Station ilawom kay PMajor Rommel Constantino alang sa entrapment operation. Ang resulta gidakop si Paraiso sa dalang Narangita.
Kahibaluan nga ang unang sabot magtagbo ang duha sa atbang sa Our Lady of Good Voyage Parish Church apan nabalhin sa Narangita street.
Human gidakop nakahilak ang magtutudlo ug sa pagkuha sa mao nga impormasyon anaa sa kustodiya sa Pendatun PNP ang magtutudlo samtang gina-andam ang kaso nga ilawom sa RA 9995 kon Anti Photo and Video Voyeurism and Grave Threat in relation to Section 6 of RA 10175. ( Ever Diazon)