LEGAZPI CITY – Nagkawsa nin dakulang perwisyo sa mga residente asin establisimento de negosyo an pagpurupalsok kan kuryente sa nagkapirang porsyon kan siyudad nin Legazpi.
Sa intrevista kan Brigada News FM Legazpi kay Kapitan Mariano Oriel kan Brgy. Oro Site, sinabi kaini na dakol na residente an nagpaabot nin reklamo mapadapit sa pagwara-wara kan supply nin kuryente haros duwang aldaw na.
Segun saiya, maabot sa 45% kan baranggay an nagnenegosyo kaya dakol na trabagho an naaapektaran.
Apwera kaini, nakaolay man kan Brigada News FM Legazpi an maintenance nin sarong water refilling station sa syudad na si alyas Mar Lumbis asin sinabi kaini na nakakaraot nin appliances an pawara-warang kuryente.
Dugang pa digdi na haros wara naman sindang pigkikita huli ta napapaduman sana sa pangkrudo kan generator.
Apwera digdi, natetengga an pagdedeliver kan tubig asin nadadagit an mga kustomer.
Naglalaom sinda, lugod matapos asin maayos na an supply kan kuryente nganing dai naman makaapektar sa urualdaw na pigigiribo.