Ginklaro ni Ceneco General Manager Atty. Dan Pondevilla nga indi ang kooperatiba nagakolekta sang ‘congestion charges’ nga ginmando sang ERC ukon Energy Regulatory Commission nga i-refund sa mga konsumedores kundi ang PEMC ukon ang Philippine Electricity Market Corporation.
Suno kay Pondevilla ang nasambit nga charges ang ginakolekta sang PEMC sa mga electric cooperative kag bangud sini ang mga distribution utilities kaangay sang Ceneco ang collector gid lamang ukon amo ang naga-kolekta sa ginasukot nga patong sa kunsumo sang kuryente sang nasambit nga talatapan.
Dugang pa sang Ceneco General Manager, ang ginmanduan sang ERC sang refund diri amo ang PEMC kun sa diin ang pundo ukon ang kuarta ang iga-refund sa kooperatiba kag ang kooperatiba amo naman ang maga-refund sa mga member consumers sini pinaagi sa rate reduction.
Sandig kay Pondevilla kun pila ang nakabutang nga generation charges sa bill sang mga konsumedores iga-iban diri kun pila ang iga-refund sa diin ang nabilin amo na lamang ang pagabayaran sang mga nagagamit ukon nagakonsumo sang kuryente.
Dugang pa ni Pondevilla ang refund maga-reflect sa November 2021 nga billing sang kooperatiba.