GITINDOGAN sa mga pro- open pit mining sa Tampakan, South Cotabato ang benepisyo nga makuha sa mga residente sa pagmina. Matud ni Vicente Katuslao, Indigenous People Mandatory Representative (IPMR) sa Barangay Tablo, nakita niya ang maayong ogma sa pagsugod sa operasyon sa pagmina.
Tungod bisan wala pa nagsugod ang operasyon sa Sagittarius Mines Inc. (SMI) naa na sa P1.3 bilyon ang nahatag alang sa community outreach mission. Apil ang scholarship program nga naka-produce og 700 ka propesyonal pinaagi sa college education support.
Dugang ni Katuslao, bisan paman wala ka-operate ang SMI gikan 1995 nakabayad na kini og P2.8 bilyon nga buhis sa national government. Samtang naa sa P54 milyon ang gihatag sa SMI nga buhis sa lokal nga panggamhanan. Base sa SMI, ang Tampakan project ang usa sa labing nga untapped copper ug gold minefields sa Southeast Asia.
Gialoman sa mining company nga ang proyekto ang magbunga og average nga 375,000 tons sa copper ug 360,000 ounces sa gold matag tuig. Kahibaloan nga nag-abot ang pro ug anti- mining nga grupo sa Kapitolyo sa South Cotabato sa Koronadal City gahapon. I Richel Gubalani