LEGAZPI CITY – Padagos pang pig-aadalan asin nasa proseso an pigbibilog na ordinansa kan konseho de barangay kan Sagpon sa banwaan kan Daraga, Albay kontra sa iligal na pagparada nin lunadan sa mga tinampong sakop kan barangay.
Sa intrevista kan Brigada News FM Legazpi kay Kap. Loreto Barajas, sinabi kaini na susog sa Local Government Code, igwa nin poder an mga barangay nganing ma-regulate, mag-impose asin mag-penalize sa mga nagkokomitir nin illegal parking alagad kinakaipuhan na susog sa ordinansa nganing magin legal.
Segun kay Barajas, inokupar na kaya kan mga behikulo na pagsadiri kan mga residente asin mga estudyante kan sarong kolehiyo an tinampo asin sidewalk na dai dapat pagparkingan.
Obheto kan saindang ordinansa na ma-regulate an parking sa lugar nganing dai na mauling an mga tawong nag-aaragi duman.
Mawot ni Barajas na mag-orolay na sana sinda sa pagpresentar ninda kan ordinansa nganing maliwanagan man an gabos na dai man dapat pinaparkingan an mga tinampong para sa walking public.
Mientrastanto, bako su boot madali an pagpapasar nin mga ordinansa kaya sa ngunyan, nagpapadagos paman an pag-aadal asin an iba pang proseso para digdi.