Nagpagawas og abiso ang Securities and Exchange Commission (SEC) batok sa usa ka nagpailang kan-anan nga ga-operate sa pipila ka bahin sa Mindanao ug dinhi sa Davao Region.
Ga-agni sumala pa kini sa publiko nga mu-invest sa pagtakuban sa usa ka franchising ug co-ownership program nga mokita ug 5% hangtod 15% matag buwan.
Sumala sa abiso sa Enforcement and Investor Protection Department (EIPD) sa SEC ang KAMAYO SEAFOODS BUFFET / KAMAYO SEAFOODS FRANCHISING AND CO-OWNERSHIP PROGRAM / KAMAYO FOOD PARK CO-OWNERSHIP PROGRAM, nga adunay mga operasyon sulod sa SEC-Davao’s Area of Responsibility (Davao Region, SOCCSKSARGEN, Cotabato City ug Maguindanao Province).
Pahimanangno sa SEC nga si kinsa mang salesmen, brokers, dealers, agents, representatives, promoters, operators, recruiters, uplines, influencers, endorsers, sa KAMAYO SEAFOODS BUFFET ang mag-atubang og silot subay sa Section 11 sa Financial Products and Services Consumer Protection Act.
Mukabat sa Php5,000,000.00 ang mamahimong multa o maximum penalty nga muabot sa 21 katuig nga pagkabilanggo.
Gawas pa niini, gitambagan usab sa SEC ang publiko batok sa lain pang 30 ka mga entidad tungod sa ilang dili awtorisado nga pagpangayo og mga pamuhunan nga wala’y kinahanglan nga lisensya gikan sa komisyon.
Dugang sa SEC nga ang maong mga aksyon susama sa pyramid/Ponzi scheme, diin ang mga investors mokita pinaagi sa recruitment fees imbes sa pagbaligya sa aktuwal nga mga produkto/serbisyo, ug ang mga investors gibayran gamit ang kontribusyon sa mga bag-ong miyembro.
Gumikan niini, gipahinumdoman ang publiko nga magbinantayon sa pag-atubang sa mga indibiduwal o grupo nga nangayo ug pamuhunan nga alang lamang sa ilang kaugalingong interest.