Andam ug nakahan-ay na ang ipatuman nga seguridad sa Cagayan de Oro City Police Office kaabag ang ubang Law Enforcement Unit sa unang State of the City Address ni City Mayor Rolando Uy nga ipahigayon sa Aquilino Q. Pimentel Jr. International Convention Center nga nahimutang sa Sitio Taguanao, Barangay Indahag ning syudad, karong adlawa.
Sumala ni Cagayan de Oro City Police Office Spokesperson Police Lieutenant Colonel Evan Viñas nga gitahasan ni City Director Police Colonel Aaron Mandia ang City Mobile Force Company partikular ang Explosive Ordnance Disposal ug K9 unit sa pag-sanitize sa venue.
Kini pinaagi sa pag-detect sa posibling itanom nga eksplosibo gikan sa dautang grupo nga planong mosabotahe sa dakong aktibidad.
Lakip ang gawas ug sulod sa venue gipaubos nasab sa clearing ingon man ang mga high rise area o building. Lauman sab nga dunay police visibility sa tanang access road pagawas ug pasulod sa Convention Center.
Hinuon giklaro ni Lieutenant Colonel Viñas nga wala sila’y nadawat nga bahad sa seguridad sa nahisgutang dakong aktibidad, ug hangyo lamang karon sa COCPO ang kooperasyon sa tanan aron magmalinawon ang selebrasyon sa Charter Day sa Cagayan de Oro.
Photo Courtesy: DPWH-Northern Mindanao