Lauman ang hugot nga seguridad sa pagahiwaton nga Kapistahan sang San Juan Bautista sa Barangay Baybay, Roxas City sa Hunyo 24, 2023, Sabado nga adlaw.
Ini ang ginpahayag ni Punong Barangay Erwin Oroceo sang mainterview sang Brigada News FM Roxas City.
Suno kay Oroceo, ginhinalaan na nila sang iya mga miyembro ang mga dapat himuon bangud madamo sang mga aktibidades nga pagahiwaton.
Ginpahayag man sini nga 30 ka mga tanod ang nagabantay sa palibot sang baybay kun sa diin gintunga nila ini sa duha ka team, 15 sa aga kag 15 man sa gab-i ang nagaduty.
Sumugod subong nga adlaw Hunyo 23 tubtob Hunyo 24 full force na ang mga otoridad sa pagbantay lakip na dire ang mga kapulisan, coast guard kag BFP agud masiguro man ang kaluwasan sang mga bisita nga magapadulong sa baybay nga makigbahin man sa selebrasyon sang Kapistahan ni San Juan Bautista.
Dugang pa sini, madamo na sila sang naeksperensyahan sa tion sang Kapistahan sa ila barangay bangud indi malikawan nga may malumos kag may nagatuga sang kinagamo.
Nagalaum man si Oroceo nga mangin matalunsay kag madinalag-on ang kapistahan sa ila lugar. | Judy Ann Juare