LEGAZPI CITY – Inagyat ni Alwin Nimo, sarong self-confessed jueteng bagman asin dating barangay kapitan kan Anislag, Daraga, Albay asi Governor Atty. Edcel “Grex” Lagman na magsairarom sa lie detector test nganing maaraman kun siisay saindang duwa an nagsasabi nin totoo.
Sinabi ni Nimo sa sarong press conference, pig-iimbitaran niya an gobernador na magdara asin magsalang sa lie detector machine nganing mapatotoohan kun sisay an nag-uutik.
Alagad, kun magigirumduman, sinabi man ni Lagman sa saro man na press conference na malinig an saiyang konsensya asin nagtutubod siya na ‘baseless’ asin kautikan an mga akusasyon saiya ni Nimo.
Mientrastanto, sa presscon ni Nimo, dara niya an saiyang mga ebidensya siring kan mga papel asin dokumentos na nagpapatotoo na nagkaigwa siya asin an gobernador nin transaksyon manungod sa su buot suhol hale sa mga operator kan iligal na sugal sa probinsya kan siya bise gobernador pa.