LEGAZPI CITY – Pighayag kan Department of Trade and Industry (DTI) Bicol na pwedesir magsangat nin complaint kontra sa mga sellers o online sellers na nagre-require sa mga consumer na magsumiter nin video kan binakal na produktong may depekto antes mapalitan o ma-refund.
Ini an tinawan-doon ni DTI Bicol Consumer Protection Division Chief Ruben Sombon sa Brigada News FM Legazpi.
Sinabi niya, maikokonsiderar na bayolasyon sa Consumer Act of the Philippines an ‘no video, no refund’ na requirement kan mga sellers sa mga parabakal.
Wara kaya su boot na sinasabi sa ‘no return, no exchange’ provision kan ley na kaipuhan i-require an mga consumer na mag-video komo patotoo na may depekto an naresibeng produkto.
An sinasabi sana digdi, responsibilidad kan seller na palitan o i-repair an produktong may depekto na binakal kan mga consumer.
Tinawan-doon pa ni Sombon, an videos o pictures, pwedesir sana magin dugang na ebidensya kan buyer alagad dai ini kasabay sa rekisitos o sa probisyon kan nasambit na ley.
Sinabi pa niya, kun habo palitan kan seller an produkto hangga’t wara nin video, pwedesir magdirekta sa mga provincial offices kan DTI nganing mag-file nin magkakanigong complain.
Pigsiyerto ni Sombon, gigibuhan ini ki aksyon kan opisina sa paagi kan pag-adal asin paghiling kan mga patotoong pinipresentar kan complainant.