Personal nga mipa-abot sa iyang pahasubo ug mihatag ug tabang si Senator Bong Go sa mga pasaherong sakay sa nahagsa nga helicopter sa Philippine Air Force sa Getafe, Bohol, Martes sa buntag, April 27, 2021.
Una niini, patay ang usa ka sakop sa Philippine Air force human ma crash ang usa ka Military Chopper (MG-520) sa kadagatan sa Brgy. Taytay, sa Getafe.
Ang nakalas giila nga si CPT. AURELIOS OLANO y OLASO, lalaki, Filipino, minyo ug sakop sa Philippine Air force, Pilot, ug molopyo sa Candijay, Bohol.
Samtang, naangol usab ang laing tulo ka sakop sa PAF nga sila 1ST LT. HILARY BUNAO y REYES, babaye, 27 anyos, dalaga, Co-Pilot, nga taga Quirino Province; A1C. REX ANAPIO y MENDOZA, lalaki , Filipino, taga Cavity, Manila ug A1C. BONN ARASULA y MAGCAWAS, lalaki nga usa gihapon ka Pinoy.
Nasayran nga alas 9 sa buntag, ang Military Attack Helicopter (MG-520) nga anaa sa Proficiency Flight aksidenteng nahagsa.
Ang kapolisan sa Getafe ug MDRRMC personnel dali nga miadto sa dapit nga nahitaboan alang sa rescue/retrieval operation inabagan sa mga mananagat sa maong lugar.
Sa inisyal nga imbestigasyon nasayran nga ang Military Chopper gikan sa Mactan Airbase Lapu-Lapu, City ug mipahigayon og Proficiency Flight apan kalit lang nga nakasinati ang maong helicopter og mechanical trouble ug nahagsa.
Ang mga mananagat sa maong lugar nga nakakita sa nahitabo dali nga miadto sa dapit nga nahitaboan ug gitabangan ang mga sakay sa helicopter nga daling nakaambak gikan sa chopper.
Pag abot sa MDRRMC ug PNP personnel nga sakay sa LGU speedboat gidali pagdala ang mga biktima sa Garcia Memorial Provincial Hospital, sa Talibon, Bohol ug anaa na sa stable nga kondisyon ang mga angol samtang patay na nga nadangat sa tambalanan ang Piloto nga si CPT. OLASO.