Ginklaro ni Atty. Will Arceño, Provincial Comelec Supervisor, nga indi obligasyon sang Comelec ang signature campaign para sa ginaduso nga Charter Change ukon pagliwat sa Economic Provision sang 1987 Philippine Constitution.
Ini ang iya ginpahayag sang ma-interview sang Brigada News FM Roxas City.
Suno kay Arceño, nasaad sa 1987 Constitution, nga sarang nga magduso sang pag-amiyenda ang publiko sa isa ka people’s initiative pinaagi sang petisyon sang 12% sang kabug-usan sang rehistrado nga mga botante, kun sa diin kinahanglan nga may representasyon ang tagsa ka legislative district sang nagalab-ot sa 3% sang rehistrado nga botante.
Dugang pa sini, sa tion nga malab-ot ang nagakaigo nga numero sang pirma, ang mga proponents sang PI ang kinahanglan magduso sang petisyon para amiyendahan ang Konstitusyon kun sa diin tsekyaron liwat ang pagka-balido sang mga pirma. | Judy Ann Juare