LEGAZPI CITY – Pig-eenganyar kan DILG Bicol pati naman kan COMELEC Bicol an gabos na mga nanggaranang mga opisyal sa barangay na magsumiter na nin Statement of Contributions and Expenditure (SOCE) antes sindang magtukaw sa puwesto.
Kinakaipuhan kaya na sa laog nin 30 dias makalihis an eleksyon, maisumiter na kan gabos na mga nagdaralagang kandidato an SOCE.
Alagad ngunyan na may binago an Korte Suprema kun sain pwedesir na tulos mag-assume nin posisyon an mga naelehir makalihis an proklamasyon, pig-eenganyar sindang dai na halaton na umabot pa hasta sa ika-30 aldaw antes sinda magsumiter nin SOCE.
Saro kaya sa importantehon na requirements an SOCE kasabay kan oath of office.
Mientrastanto, segun kay DILG Bicol Regional Director Atty. Arnaldo Escober, Jr., anuman na oras pwedesir na nindang i-approach an mga alkalde asin mga otorisado sa pag-oath-taking nganing makapanumpa na basta dara ninda an saindang certificate of proclamation na sinda an nangganang kandidato asin syertuhon man na settled na an saindang SOCE.