GIBUTYAG ni Chester Warren Tan, National President sa Swine Producers Association of the Philippines nga motabang ang Swine Producers Association of the Phlippines kun SOCOSPA sa mga backyard raisers nga apektado sa isolated case sa African Swine Fever kun ASF sa GenSan.
Sa karon, ginaawhag ni Tan nga dili na una magbuhi og baboy tungod alanganin ang area tungod congested ug mas maayo nga laing panginabuhian na lang sama sa pagbuhi og manok, kanding ug uban pa.
Nakigdayalogo matud pa ang taga SOCOSPA sa City Vet ug Department of Agriculture aron mahisgutan ang livelihood assistance sa apektadong pamilya.
Nasayran nga 508 ka baboy ang gipailalom sa culling ug gipanglubong tungod sa kaso sa ASF sa purok San Lorenzo, Brgy.Apopong.
Human sa culling, mulongtad pa og pipila ka bulan ang hulaton aron masiguro nga luwas na sa virus ang area, apan wala na gina-encourage ni Tan ang mga apektadong pamilya nga mobalik sa pagbuhi og baboy.
Samtang gipaniguro ni Tan nga walay angayang ika-panic ang mga tawo tungod contained na ang isolated case sa ASF sa GenSan ug luwas ang mga karneng baboy nga gibaligya sa palengke ug mall tungod miagi sa pagsuta sa NMIS.