Kinahangean eon makarun ro sangka Basic Search and Rescue SAR ag First Aid Skills Training para sa tanan nga mga estudyante ag atleta kaeakip eon ro mga nagadumaea it mga pampubliko ag pribadong eskwelahan sa banwa it Kalibo.
Sa Resolusyon nga gin-aprubahan ku Sangguniang Bayan it Kalibo, ginpa-abot ni SB Member Matt Aaron Guzman nga kinahang-ean kaantigohan ro mga estudyante ag mga nagaturo nga magtao it First Aid sa oras it kalamidad.
Suno kay Guzman, mabaskug ro pang-eawason it rondayang mga estudyante ag atleta ngani mas mayad nga taw-an sanda it prayoridad nga matur-an ku Municipal Disaster Risk Reduction and Management Office – Kalibo sa pagdumaea ni Mr. Terence June Toriano, LDRRMO III.
Ginpa-abot man ni SB Member Phillip Yerro Kimpo Jr. nga ro Red Cross Youth hay nagahiwat man it kaparehung training ngani pwede man makipag-bueoligan para mahimo ro mga plano. // ANN DESLENE SALAZAR