LEGAZPI CITY – Sinabi kan Commission on Higher Education (CHED) Bicol na anuman na aktibidad na gigibuhon kan State Universities and Colleges (SUCs) ngunyan na kapaskuhan, dapat susog man giraray sa CHED Memorandum Order No. 9, series of 2013 o an policy guidelines kan students affairs and services.
Segun kay Dr. Jean Go, Education Supervisor II kan komisyon, dapat igwa nin koordinasyon an mga SUCs sa proper authorities siring kan law enforcement agencies para sa mga aktibidad na gigibohon sa luwas man o sa laog kan eskwelahan nganing masiyerto an kaligtasan asin seguridad kan kagabsan.
Dugang pa ni Go, regular man an saindang monitoring sa mga eskwelahan asin kada quarter igwa nin target an ahensya na hilingon kun nauutob an guidelines and policy pag-abot sa seguridad kan mga estudyante.
Tinawan-doon kaini, kinakaipohan na kada unibersidad asin kolehiyo, igwa nin eligible na security personnel sa pagtatao nin seguridad sa mga maatendir nin aktibidades.
Sinabi pa kan opisyal, responsibilidad kan Higher Education and Institution na magkaigwa nin mechanism nganing maibetaran an dae ta gusto mangyaring maraot siring kan pagapasabog sa sarong gym sa university sa Mindanao, kun saen apat an nairehistrong casualty.