KALIBO, AKLAN—Nakabaton it Wounded Personnel Medal do sangka suldadong Aklanon nga kaibahan sa nakipagbakbakan sa mga Communist Terrorist Group sa Brgy. Cabacnitan, Bilar, Bohol ku Marso 25, 2021.
Mismong si Col Jerry Borja, GSC PA, Commander Task Group Cebu, Bohol and Siquijr kaibahan si LTC Allyson Depayso (INF) GSC PA, Commanding Officer it 47IB do nagtao it nasambit nga award kay PFC Tranquilino Francisco Jr., personnel it 47IB, 3rd Infantry Division, Philippine Army ku June 4, 2021 sa Governor Celestino Gallares Memorial Hospital sa Tagbilaran City, Bohol.
Sa nasambit nga 30 minutos nga sagupaan, si PFC Francisco hay nagpakita sigon it kaisog nga nangin rasun kung ham-an raya naninihan sa encounter nga ginaeakipan it mas o menos 11 nga fully armed terrorist group.
Madumduman, do major engagement hay nagresulta agud nga ma-neutralize do limang CTG members kaibahan si Romeo Nabas @Marlon, do Vice Commanding Officer it SYP, BPC ag nakarecover man it mga high powered firearms ag pilang war materials.
Nasayuran nga do Wounded Personnel Medal ay ginatao sa mga personnel it Armed Forces of the Philippines bangud sa andang ginpakita nga kaisog nga nagresulta sa andang pagiging wounded in action samtang ginasuk-ean do mga terorista. // SHERRY ANNE REUNIR-VIDAL