LEGAZPI CITY – Arestado an sarong lalaki na suspek sa paninigbas sa Purok 2, Sitio San Roque, Brgy. Bascaran, banwaan kan Daraga, Albay.
Binisto ining si alyas “Glen”, nasa tamang edad asin residente kan nasambit na lugar.
Basado sa report kan hepatura kan pulisya kan banwaan, nagkaigwa nin dai pagkasinabutan an suspek asin an biktimang residente man kan kaparehong barangay.
Nagresulta ini sa paninigbas kan suspek sa biktima.
Susog pa sa impormasyon, narekober sa lugar kan insidente an ginamit sa paninigbas sa biktima.
Mientras, nadakop man sana an suspek kan mga pulis sa tabang naman kan mga opisyales de barangay, mantang an biktima na nagsapar ki lugad sa manlain-laing parte kan hawak, tulos man tinawan nin atensyon asin idinalagan sa ospital.
An suspek, nahahampang man sa kasong frustrated homicide asin presete nang nagtetenir sa nasambit na hepatura para sa magkakanigong disposisyon.