‘WALA tay mahimo kay gikuha naman gayod ang among mga baboy bisan manganakay na gihurot gayod og kuha sa taga City Veterinary Office gumikan sa isyu sa ASF.’
Sa paghinabi sa 89.5 Brigada NewsFM Gensan sa nagpangalang Edward usa ka lomolupyo sa Purok San Lorenzo Ruiz gikumperma niini nga ang ulahing gikuha sa ilang dapit ang anay sa iyang bayaw nga manganakay na.
Gihurot na og kuha tanan ang mga binuhing baboy sa ilang kalye, sa iyang balay tulo ka baboy duha niini ang anay, gibayran usab siya og tag P5,000 pesos matag usa, apan alang kaniya kulang kayo kay kon sa sakto nga presyo anaa sa tag P15,000 pesos ang matag ulo sa dakung baboy.
Gidugang ni Edward nga wala na silay laing panginabuhian luwas sa babuyan, kon mahurot ang gihatag nga kwarta ngadto kanila wala na silay laing source of income,mao nga kinahanglan nila ang dugang alalay gikan sa Local Government Unit sa Gensan.
Samtang ang ubang nagpuyo sa Purok San Lorenzo Ruiz nga distansya sa pinuy-anan nilang Lucela Agbay under monitoring lang ang ilang mga baboy kay gawas naman sila sa 500 meters radius sumala sa anunsyo sa taga City Veterinary Office.
Sumala ni Elizabeth Subaan nga aduna usab silay mga baboy, unom ka tuig na sila nga nagpuyo sa lugar og karon lang sila nakadungog sa isyu sa African Swine Fever kon ASF.
Gidugang ni Subaan nga nagabuhi sila og baboy para sa kaugalingon lang nga consumption, wala usab sila naga pangumpra sama sa nasakpan sa taga City Vet nga igsuon ni Lucela nga si Franco nga nagapangumpra og baboy sa laing barangay ug gibutang sa tangkal sa iyang igsuon sa Purok San Lorenzo Ruiz, Apopong.
Basi sa kopya sa Delivery Receipt nga gipakita ni Lucela Agbay sa Brigada kaniadtong Enero 21, 2022 adunay 24 ka mga baboy ang gidala sa iyang igsuon sa ilang compound, 22 kabuok nga baktin unya adunay duha ka dagku na, mao nga ginapaklaro usab ni Lucela nga dili iyaha katong nasundan sa otoridad nga kinumpra nga mga baboy. I Ver Diazon