Gihangop sa kagamhanan sa dakbayan sa Sugbu ang tanyag sa Catholic Bishops’ Conference of the Philippines kon CBCP nga mahimong gamiton ang mga simbahan isip vaccination sites.
Matud ni Cebu City Mayor Edgar Labella, dakung tabang ang maong tanyag sa CBCP sanglit daghan ang mga simbahan niini ug arun usab madugangan ang upat ka mga vaccination site sa syudad .
Kahinumduman nga una nang namahayag si CBCP President Arsobispo Romulo Valles nga bukas ang mga simbahang katoliko nga magamit isip vaccination sites subay sa nagpadayun nga vaccination program sa nasud.
Samtang, gitug-an usab ni Mayor Labella nga mitanyag ang Cebu Doctor’s University Hospital sa ilang mga pasilidad aron nga magamit usab isip mga vaccination site diin gikalipay usab kini sa mayor gumikan kay matud niya, kompleto ang maong mga pasilidad sa mga ekipo sama sa gym ug sa sistema niini nga makaakumudar og 300 ngadtu sa 500 ka mga indibidwal nga magpabakuna. ///