Dakpan sa gilusad nga entrapment operation sa Buhangin Police Station ang usa ka Taxi Driver nga nang-abuso pinaagi sa wala paggamit og metrohan.
Gipangunahan ang maong operasyon sa mga sakop sa LTFRB, Buhangin Police ug CTTMO ug ang dinakpan nailang si Randel Manuel Villacarlos, 49 anyos, minyo, residente sa SIR, Phase 2 ning syudad ug driver sa Durian Taxi.
Gikasa ang maong operasyon human sa pipila ka mga reklamo nga nadawat sa opisina ni Davao City Mayor Sebastian Baste Duterte ug sa kapulisan bahin sa overcharging, inay nga gamiton ang metrohan kontratahon niini og pakyawan, labi na diha sa mga gatorno gawas sa Davao International Airport.
Sa operasyon, misakay ang duha ka mga personahe sa kapulisan sa taxi ni Villacarlos nga nagpaka aron ingnun nga pasahero gikan airport padulong sa Calinan.
Ug didto nakumpirma ang hinimoan sa driver nga inay mugamit sa metrohan naningil hinoon kini og P1, 300.
Atol sa pagdunol sa bayad, daling giposasan ang driver ug didto nasayran ang daghanang bayolasyon niini nga gilangkuban sa wala pagsuot og uniform, guba nga suga, depektibong busina ug daghanan pa.
Gihikay na ang mga dokumento alang sa pagpasaka og kaso sa driver ug ugaling mapamatud-an nga sad an mamahimong bakwion ang iyang lisensiya ug higpit nang did-an nga makamaneho og bisan unsang sakyanan ug pagka-priso.