NINAUG ang technical team sa Comelec Central Office sa mga local nga opisina sa Comelec aron tabangan sila sa paghan-ay sa ilang mga clustered precinct gumikan sa padayon pa nga pandemya nga posibling maka-apekto sa umaabot nga election sa 2022.
Sa kumpermasyon ni Election Officer 4 Anwar Paidumama sumala niini nga nagapasalamat sila sa mga local nga opisina sa Comelec gumikan gitabangan sila sa paghan-ay sa ilang mga presento sa umaabot nga piniliay.
Sumala kay Paidumama sa miaging piniliay anaa sa 1,000 ang ihap sa botante sa usa ka clustered precinct sa karon gihimo nalang 800 ka botante sa usa ka clustered precinct.
Ang tumong daw niini aron mapaubsan ang ihap sa mga tawo nga magdasok gumikan sa pandemya basin may positibo sa Covid-19 unya matakdan ang uban nga anaa sa pila.
Ang laing nakita sa mga IT experts sa Comelec mao ang record sa Comelec adunay pipila ka application nga pending pa sa ilang record sa computer mao nga gihimuan og paagi nga malakip sa talaan sa mga na- aprubahan sa Election Registration Board kun ERB hearing.
Hinuon anaa lang sa walo ang nakitang pending sa record sa Comelec Polomolok ug sa karon maapil sila sa mga makaboto sa umaabot nga piniliay. ( Ver Diazon)