Naipit gid ang tiil sang pahinante sang dump truck matapos bumunggo sa Volvo passenger bus sa national highway sa banwa sang Dumarao takna alas 10:15 sang aga, Sabado, Nobyembre 25.
Ginkilala ang driver sang bus kay Jennifer Ablao, 42-anyos, residente sang Balabag, Malay, Aklan samtang ang driver sang dump truck amo si Felipe Planton, 58-anyos, residente sang Binalbagan, Negros Occidental kag ang pahinante ginkilala kay Dave Unacin, 22-anyos, residente sang Parian, Sigma, Capiz.
Sandig sa impormasyon nga nakuha sang Brigada News FM Roxas City sa Dumarao Municipal Police Station, pareho nga ginasubay sang passenger bus kag dump truck ang dalanon nagikan sa direksyon sang Cuartero.
Ginapahayag nga pag-abot sa ginluntaran sang aksidente nagliko kag nagpundo ang bus, apang hinali nalang ini nga ginsungay sang kasunod nga truck.
Bangud sa natabo, sinalakay pagid sang truck ang baligyaan sang lechon manok kag donut nga yara nahamtang sa higad sang karsada.
Madasig naman nga nagresponde ang mga katapo sang BFP- Dumarao Fire Station kag gindapatan sang pauna nga pagbulong ang pahinante nga naipit ang tiil sa natabo nga aksidente kag ginpadangat sa pinakamalapit nga ospital.
Sa karon, hilway na sa prisohan ang driver sang dump truck matapos nagpromisa nga pagabayaran ang mga kahalitan nga gintuga sang aksidente kag ginpakamaayo naman sang mga tagreklamo nga indi na magpasaka sang kaso. | Judy Ann Juare