Matapos ro pilang dag-on nga pagpanago sa mga otoridad, naaresto eon ro Top 2 most wanted person it Western Visayas sa Barangay Tig-amaga, Migao-ao, Iloilo.
Ginkilaea ro wanted person nga si Raymund Paner, alias Panen, 33 anyos ag residente it Barangay Tula-tula, Sibalom, Antique.
Ro madinaeag-on nga manhunt operation hay ginpatigayun it mga elemento it Sibalom Municipal Police Station, pilang units sa idaeum it Antique Police Provincial Office ag Special Action Force.
Sa report, nasayuran nga ro akusado hay aktibong miyembro it communist terrorist group nga naga-operate sa idaeum it Squad 1, SDG (Suyak) Platoon, Southern Front Committee, Komiteng Rehiyon-Panay.
Gin-aresto imaw sa bisa it daywa ka warrant of arrest para sa kasong murder ag Direct Assault Upon a Person in Authority.
Owa it ginrekomendang piyansa para sa anang kasong Murder samtang P12,000 man ro piyansa para sa anang kasong Direct Assault.
Nag ugat ro kaso ni Paner sa natabo nga pagpamuno ku gabii it December 11, 2013 sa Barangay Tula-tula kung siin imaw ro ginaturo nga responsable sa pagkamatay ni Leonardo Dunganon, Sr., ag pagpanakit kay Leonardo Dunganon, Jr., sangka barangay official sa nasambit nga lugar.
Ro akusado hay presenteng sa kustodiya it Sibalom Municipal Police Station para sa documentation ag sa pag-turn over sa korte. / ANN DESLENE SALAZAR