Arestado sang mga kapulisan ang isa ka lalaki nga ginakabig top 4 most wanted person sa Provincial level kag top 2 naman sa City level sa Brgy. Lawaan, Roxas City.
Ginkilala ang akusado kay alyas Intsik, 47-anyos, mamumugon kag residente sang Sitio Bang-bang Street, Brgy. Inzo Arnaldo Village, Roxas City.
Nagapangatubang ini sang duha ka kaso nga may kahilabtanan sa iligal nga droga kag paglapas sa RA 10591 ukon Comprehensive Law of Firearms and Ammunition Act.
Ang warrant of arrest ang gin-isyu kag ginpirmahan ni Judge Faustino Valenzuela Roxas, RTC, 6th Judicial Region, Branch 18, Roxas City napetsahan Nobyembre 6, 2023.
Ginrekomendar sang korte ang piyansa nga P200,000 para sa kaso nga paglapas sa RA 9165 ukon Comprehensive Dangerous Drugs Act of 2002 kag P120,000 naman para sa kaso nga paglapas sa RA 10591 ukon Comprehensive Law of Firearms and Ammunition Act.
Sa karon, nagapabilin ini sa kustodiya sang Roxas City PNP para sa nagakaigo nga disposisyon. | Judy Ann Juare