GIWAGTANG na ang total liquor ban sa GenSan sugod kagabi, Agosto 6.
Kini human gipagawas ni Mayor Ronnel Rivera ang Executive Order number 34 nga nag-amenda sa total liquor ban.
Sa maong E.O 34, total liquor ban pa gihapon atol sa matag adlawng Dominggo, asa ginapatuman ang Sunday lockdown.
Lunes hangtud Sabado liquor ban pa gihapon gikan alas 10 sa gabii hangtud alas 5 sa buntag, nga nagpasabot nga sa buntag hangtud alas 9 sa gabii, Lunes hangtud Sabado, mahimo nang makapalit og ilimnong makahubog ug makainom og bino.
Sa mga establismento nga ga-serve og ilimnong makahubog ug ubang intoxicating drinks hangtud alas 9 lang sila gitugutang mag-serve.
Samtang nagpabilin gihapon ang curfew sa GenSan sugod alas 10 sa gabii hangtud alas 4 sa kaadlawon, ingon man ang no movement Sunday.
Nasayran nga mihangyo ang mga liquor ug retail establishment sa pagtangtang sa liquor ban tungod mihinay na ang ilang kita.