Gilayon nga nagpatawag si Capiz Governor Fredenil Castro sang pagsinapol kaupod ang mga nagpasakop sa Trade Mission sa South Korea.
Matapos ang mabinungahon nga byahe para tukibon ang mga pamaagi kag ginawi sang street food industry sa South Korea, gindiskusyonan kag ginhinalaan ang mga tikang nga pagahimuon para mapasanyog ang turismo kag street food sa probinsya..
Gin-presentar sang mga delagado sa gobernador ang ila mga obserbasyon, natun-an, kag mga ideya nga mahimo makabulig sa pagpabaskog sang streetfood industry sa Capiz.
Ginlaragway man nila ang mga estratehiya sa pag-promote sang streetfood nga ila nakita sa South Korea kag ginkompara sa kung ano ang may ara ang probinsya subong para makita kung sa diin nga aspeto ang aton dapat i-improbar.
Si Atty. Luvim D. Amores – HRMO Head, G Antonio Arbis – Provincial Budget Officer, Alphonsus Tesoro – Provincial Tourism Officer, Wilar C. De los Santos – PPDO Coordinator, Sylvia De la Cruz -Provincial Agriculturist, Nelva Adricula – Provincial Engineer, Lucca Vestidas – Provincial Multimedia Operations Coordinator kag Janice Anne Zaldarriaga, Co-chairman sang Provincial Tourism Council ang ginpadala sang probinsya sa sini nga trade mission.
Ang South Korea Trade Mission isa ka butang nga nagapakita sang determinasyon sang gobyerno probinsyal nga mapauswag ang street food industry kag turismo sa probinsiya. Paagi sa pag-aplikar sang mga natun-an, mga pamaagi, kag mga ideya nga nabaton nila sa sini nga pagbisita, ang Capiz magabaton sang inspirasyon kag bag-o nga mga oportunidad para mapabaskog ang sektor sang street food kag padayon nga mapatigayon ang kalidad, seguridad, kag serbisyo sini. | KMD Gicalde