Miani og pagsaway gikan sa publiko ang nahimong kasaypanan sa Traffic Group human gipang-isyuhan og citation tickets ang mga motorista kay nisupak matud pa sa speed limit partikular sa Orange Grove hantud sa Matina Pangi Crossing sa Diversion Road, Davao City.
Kalabot niini, gipavalidate na sa City Transport and Traffic Management Office kon CTTMO ang mga citation tickets aron dili makabayad og penalty ang mga naisyuhan niini sa niaging Domingo.
Una nang giangkon ni Traffic Group Chief PCol. Nolan Raquid atol sa interview sa Davao City Disaster Radio nga ubay-ubay ang ilang naisyuhan human nilapas sa 30kph ang speed limit.
Apan nasayran nga nagpabilin 60km/hr lang ang speed limit sa maong dalan base sa dugay nang executive order nga gipagawas ni Davao City Mayor Inday Sara Duterte busa invalid na ang mga naisyuhan niini.
Nangayo na hinoon og dispensa ang TRaffic Group sa kalangan nga nahatag sa mga motorista nga ilang nasita apan gihingusgan nga ilang iduso nga himoong 30kph ang speed limit sa diversion road hangtud sa Matina Pangi nga giilag accident prone area. BNFM-DAVAO
