LEGAZPI CITY – Pigklaro kan lokal na gobyerno kan Pilar, Sorsogon sa pamayo ni Mayor Carolyn Sy-Reyes na bako rekognisado o lehitimo an pig-iisyung tribal driver’s license, tribal vehicle plates asin motor vehicle registration sa banwaan.
Sa intrevista kan Brigada News FM Legazpi sa alkalde, sinabi kaini na igwa ki grupong inaapod na Maharlika Native Tribe Agta an nag-iisyu kan mga nasambit na dokumento sa mga miyembros kaini sa Pilar.
Sinabi man kaini na sa record mismo kan National Commission on Indigenous Peoples (NCIP), dai sinda accredited o rekognisado komo sarong tribo sa irarom kan komisyon.
Segun pa sa alkalde, nagkaigwa sinda nin kaaraman mapadapit digdi kan igwang tricycle driver na nagpresentar na tulos man nindang pigkoordinar sa NCIP magin man sa Land Transportation Office (LTO).
Wara su boot ki poder an siisay man dawa pa an lokal na gobyerno na mag-isyu ki mga driver’s license apwera sana sa LTO.
Nin huli kaini, pangapodan ni Reyes sa publiko na dai magtubod sa mga matao ki siring na lisensya kan mga grupo na siring kaini.