Nag-angkon sang pilas sa likod ang isa ka tricycle driver matapos ginluthang sa Hermano Subdivision, Brgy. Punta Tabuc, Roxas City takna alas 9:30 kagab-i sang Miyerkules, Enero 3.
Ginkilala ang biktima kay Sandy Lara, 34-anyos, may live-in partner samtang ang ginatudlo suspek amo si Mark Legaspi, yara sa legal nga pang-edaron kag lunsay mga residente sang nasambit nga lugar.
Sandig sa impormasyon nagikan sa Roxas Component City Police Station, nagpanawag sa ila istasyon si Dionesio Rose Jr., Barangay kagawad sa lugar agud ireport ang natabo nga shooting incident.
Naguwa sa imbestigasyon sang kapulisan, naga-charge sang cellphone ang biktima sa balay ni Dionesio Rose Sr., samtang nagahulat ini sa guwa sang balay hinali nalang nag-abot ang suspek kaupod ang wala makilala nga persona kag nagasakay ang mga ini sa motorsiklo.
Nagbunot ini sang .45 caliber nga armas-luthang kag gintiro ang biktima sa likod.
Gilayon nga gindala sa St. Anthony Hospital ang biktima para sa nagakaigo nga pagbulong.
Narekober sa lugar ang isa ka empty shell sang nasambit nga armas-luthang kag isa ka slug.
Love Triangle ang ginalantaw nga motibo sa pagluthang sa biktima.
Sa karon, padayon ang hot pursuit operation sang kapulisan agud madakpan ang suspetsado. | Judy Ann Juare