Milyones nga kantidad sa iligal nga droga ang nakompiska gikan sa usa ka suspetsadong tulak sa gipahigayong drug buy bust operation sa Lasang, Davao City alas 8:00 kagabii.
Sa report sa Davao City Police Office giila ang suspek nga si Jaber Sarangani, 24-anyos, bulag sa asawa nga taga Domingo 2, Sasa, ning syudad.
Sumala pa nga unang napalitan ang suspek og shabu balor P65,000 sa pulis nga nagtakubang buyer gamit ang boodle money og didto na siya giaresto.
Sa pagrekesa sa otoridad ngadto ni Sarangani didto na nakuha ang shabu nga mutimbang sa 850 grams nga gibanabanaang mukantidad sa P13,600,000.
Ginasubay na karon sa otoridad kon asa ginakuha sa suspek ang iyang shabu ingon man kinsa ang iyang ginadeliveran.
Kasong paglapas sa R.A 9165 o Comprehensive Dangerous Drugs Act of 2002 ang atubangong kaso sa dinakpan. BNFM-Davao
