LEGAZPI CITY – Isinagibo kasuudma an ultimong aldaw kan training para sa Public Financial Management Competency Program (PMFCP) sa pamayo kan Department of Budget and Management (DBM) sa sarong hotel sa syudad din Legazpi.
An nasambit na training, pinunan pa kan Marso 6 na inatendiran kan gabos na Local Budget Officers asin Local Government Units (LGUs) sa bilog rehiyon kan Bicol.
Obheto kan programa na magpakusog an technical competencies para sa mga PFM practitioners dangan magtao nin kaaraman asin solusyon sa mas epektibong job performance.
Tinukar man an mga manungod sa features kan Philippine Government Electronic Procurement System (PhilGEPS) na kun sain kairiba digdi an eMarketPlace, Advance Data Analysis, eWallet, ePayment, eBidding, Virtual Store, asin iba pang features.
Presente man sa aktibidad si DBM Secretary Amenah Pangandaman nganing ipaaram na an House bill 9648 o “New Government Procurement Act” pasado na sa final public hearing kan House of Representatives kan nakalihis na Pebrero 28 sa ngunyan na taon.
Segun pa kay Pangandaman, an budget allocation sa ngunyan na taon, nasa 52.36 billion pesos sa bilog na rehiyon dangan 11.22 billion pesos sa buong Albay.
Mientrastanto, nag-atendir man si Albay Governor Atty Edcel “Grex ” Lagman” nganing ipahiling asin itao an saiyang suporta sa nasambit na programa. | Brigada Intern RICHELLE ASTOR