Patay ang isa ka umagad matapos ginhatuk-hatok buno sang iya ugangan sa Barangay Malitbog, Tapaz, Capiz takna alas 8:45 kagab-i sang Martes.
Ginkilala ang napatay kay Orly Bernerable Cornillo, 38-anyos, isa ka construction worker kag residente sang Brgy. Caridad, Jamindan.
Samtang ang suspek amo si Leopoldo Majadora alyas Putot, 56-anyos, isa ka mangunguma kag residente sang Barangay Malitbog, Tapaz, Capiz.
Sandig sa imbestigasyon sang Tapaz Municipal Police Station, nagpadulong ang biktima sa balay sang iya ugangan nga nakainom kag nagtuga sang gamo, ginapahayag nga ginapahipos ukon ginapahanumduman sang suspek ang biktima bangud nagakatulog na ang mga tawo sa sulod sang iya balay.
Nagpatunga ang indi pag-intindihanay sa biktima kag suspek rason nga nagkuha sang matalom nga hinganiban ang ugangan kag ginhatok-hatok buno ang iya umagad.
Bangud sini nag-angkon sang patal nga pilas sa dughan kag liog ang biktima nga gintunaan sang gilayon nga kamatayon.
Madasig naman nga nagpalagyo ang suspek matapos ang nakumiter nga krimen.
Narekober sang mga kapulisan sa lugar ang isa ka bolo kag isa ka steel pipe.
Sa karon, padayon ang hot pursuit operation sang Tapaz PNP sa suspek. | Judy Ann Juare