Paningkamotan sa Cagayan de Oro City Commission on Elections Office nga matapos ug makompleto ang updated nga voters list sa unang semana sa Agosto ning tuiga, sa dili pa magsugod ang election period alang sa Barangay ug Sangguniang Kabataan Elections karong Oktubre.
Gibutyag ni City Comelec Officer Atty. Ramil Acol nga dobli ang ilang pagpaningkamot karon aron mahinloan ang listahan sa mga tawong kwalipikadong makabotar.
Lauman nga pinaagi sa paghinlo sa listahan, matangtang na ang mga botante nga mipanaw na lakip ang mga nag-dobli og rehistro ug mga nag-transfer.
Mas mapadali nasab ang paghinlo sa listahan homan nga pormal nga milagda sa Data Sharing Agreement ang kagamhanang lokal sa Cagayan de Oro ug ang City Comelec sulod sa lima ka tuig.
Katuyuan sa nahisgutang kasabutan nga mahatagan sa Local Civil Registrar og kopya ang Comelec sa mga nangamatay nga botante.