ANGOL ug nadali sa pagdala sa tambalanan ang usa ka utility worker sa Dr. Jorge P. Royeca Hospital human gipusil alas 5 sa hapon sa Purok Luningning, Malipayon, Brgy.San Isidro, GenSan.
Ang biktima nailhan sa alyas Johnson Pagaduan, 26-anyos, usa ka utility worker, residente sa Luningning Compound, Brgy San Isidro.
Sakay ang biktima sa Kawasaki motorcycle nga may plate number LW2351 dihang gipusil sa suspek nga nakaangkas usab sa TMX motorcycle kolor pula.
Segun sa angkas sa biktima nga si Chary Sinahonan Mahasol, 28-anyos, ug residente sa Prk 2., Brgy Katangawan nga mukuha unta og ATM aron mag-withdraw dihang giduolan sa duha ka suspek ug gipusil hinungdan sila nahagba, apan wala maigo ang babaye.
Dugang pagbutyag ni Chary nga tulo ka buto ang nadunggan ug paghawa sa mga suspek, nagpabuto pa og kaduha.
Gidali sa paghatod sa ospital ang biktima human nakita sa sikad driver nga natapsingan lang ang biktima ug nahagba sa dalan. Kasamtangan giimbestigahan pa kapulisan sa San Isidro PNP ang maong insidente, nga sobra na sa 30 ka pagpamusil ning tuiga.