Wala pa nabaton sang kampo ni Tangub Punong Barangay Noli Villarosa ang kopya sang suspension order nga ginpapanaog sang Office of the Ombudsman, ini ang ginpahayag sang legal counsel sini nga Atty. Dindo Ramos.
Ginpahayag ni Ramos iya ginaklaro ang nagpadala kag ang nagpapanaog sang ‘order of suspension’ amo ang talatapan sang Department of Interior and Local Government – Bacolod kun sa diin sa subong ginareserba nila ang ila sini nga kinamatarong sa pag-file sang motion for reconsideration.
Suno kay Ramos sandig sa ila sini nga nahibaluan, na-dismiss una ang ginpasaka nga kaso kriminal batok kay Villarosa magluwas sa ginapangatubang sini nga kaso administratibo.
Sa subong ginahulat sang kampo ni Villarosa ang aktwal nga resolusyon sang Ombudsman nahanungod sa pagpatuman sang ‘6 months suspension’ batok sa natungdan nga punong barangay.
Ang ‘suspension order’ batok kay Villarosa may kaangtanan sa reklamo sang duha ka kagawad sang barangay angut sa pagka-atrasar sang sweldo sang mga JO workers kun sa diin ginapahulam niya ang mga ini sang kwarta may saka nga dyes porsyento.