GIPAKLARO karon ni Bobet Morales, volunteer social worker sa KaBrigadahan GenSan nga may minilyon ka pesos nga natigom ang KaBrigadahan apan ang tanang kantidad ang naapod apod ngadto sa mga nanginahanglan nga miyembro.
Giangkon ni Morales nga tinuod gigisa sa kaugalingong mantika ang mga miyembro apan kini alang sa kaayohan ug sa ilang panginahanglanon aron dili na magluhod luhod sa mga pulitiko.
Matud pa nga daghan ang natabangan nga mga miyembro sa ilang panginahanglan sa pangbayad sa ospital, pangpalubong, pangpalit og tambal ug uban pang panginahanglanon nga bisan wala natubag ang tanan, apan may natabang.
Gitino usab ni Morales nga ang programa ang pagtinabangay sa mga miyembro apan wala matud pay pinugsanay ug voluntary lamang.
Pinaagi sa KaBrigadahan, gitudloan ang mga tawo sa pagtabang sa ilang isig katawo tungod kung sa gobyerno, madugayan pa ug usahay dili pa matabangan. Subay sa record, anaa sa P19 million ang nahatag nga kantidad sa mga miyembro asa P18 million gikan sa ilang pag-amot amot sukad natukod ang KaBrigadahan GenSan ug P1 million gikan sa KaBrigada Foundation.