Binawian ng buhay ang isang lolo sa Brgy. Aurora, Alicia, Isabela matapos mabangga ng Forward Truck ang kaniyang minamanehong kuliglig kaninang alas-6:30 ng umaga ngayong araw, November 2.
Ang nasawi ay kinilalang si Ernesto Pattung, 66-anyos, magsasaka, at residente ng Aurora, Alicia habang kinilala naman ang drayber ng Forward Truck na si Jeffrey Madrid, 31-anyos, residente ng San Mateo, Isabela.
Batay sa imbestigasyon ng Alicia Police Station, napag-alaman na binabagtas ng truck ang pa-silangang direksiyon papunta sa town proper ng naturang bayan.
Mabilis umano ang patakbo ng truck kung saan nang makarating sa pinangyarihan ng insidente ay nag-overtake ang truck sa sinusundan nitong dump truck na nag-resulta ng pagkakabunggo sa kuliglig na sinasakyan ngbiktima na nasa shoulder lane.
Nagtamo ng matinding pinsala sa katawan ang lolo at naisugod pa sa pagamutan ngunit idineklara itong dead-on-arrival ng kaniyang attending physician.
Sa kasalukuyan, nasa kustodiya na ng Alicia PS ang driver ng truck at mahaharap sa kasong Reckless Imprudence Resulting in Homicide and Damage to Property.