Dead on arrival sa ospital ang wala makilala nga driver sang single nga motorsiklo samtang pilason naman 5 ka pamatan-on nga sakay sang tricycle sa Barangay Parian, Sigma, Capiz.
Ginkilala ang driver sang tricycle kay Kevin Jem Buenavides, 21-anyos, kag ang mga pasahero sini nga sanday Kim Base, Isidro Bolante, Joemel Buaron, kag Elyab Base.
Sandig sa imbistigasyon nagikan sa Sigma PNP, ginapahayag nga samtang ginasubay sang tricycle ang dalan gikan sa Ivisan padulong sa nasambit nga lugar sang hinali lang pag-abot sa kurbadahon bumunggo ang ginamaneho nga motorsiklo sang biktima sa sidecar sang tricycle.
Nakuhaan pa sang CCTV footage sang Barangay ang natabo nga aksidente kun sa nakita ang naga-ekis kag madasig nga dalagan sang motorsiklo.
Bangud sa natabo, nag-angkon sa patal nga pilas ang wala makilala nga driver samtang lunsay pilason ang mga sakay sang tricycle nga gintagaan man sang pauna nga pagbulong kag gindala sa Sigma PNP para sa nagakaigo nga disposisyon.