Samdan ang upat ka indibidwal ug usa niini ang anaa sa kritikal nga kondisyon human sa nahitabong pagpamusil sa Purok 4, Bayview, Km. 11 Sasa, ning syudad sa Davao, pasado alas-4:00 karong hapon, Hunyo 11, 2023.
Ang suspek nailang si Alyas “Teteng”, 43 anyos, company driver ug residente sa nasangpit nga lugar.
Sumala pa sa mga nakasaksi sa panghitabo nga biktima sab sa maong insedente, nagkalalis ang duha ka managsilingan, gisulayan pa sa pagbadlong sa lain pang silingan ang duha ka nagkalalis, gani niapil sab sa pagbadlong ang suspek.
Apan kalit na lamang nga mibunlot ang suspek sa iyang armas og gipamusil ang biktima nga nailang sila alyas Tony, ug giapil niini ang lain pang tulo ka mga biktima nga anaa lamang nagstandby duol sa nahitabon nga nailang sila alyas Rommel, Alyas Andres, ug alyas Crisanto.
Human sa iyang gihimong krimen, paspas kini nga misibat sa lugar.
Apan daling nagpahigayon ang Sasa Police sa pagpanguna ni PMAJ JAKE C GOLES, Station Commander, og hot pursuit operation nga miresulta sa pagkasikop sa suspek, alas-7:20 karong gabii sa Nile Street, Garcia Heights, Brgy. 19-B, ning syudad.
Narekober pa sa otoridad ang armas nga gigamit niini nga gilabay sa kasagbotan nga bahin likod sa Seawind Condominium, Sasa Davao City.
Anaa na sa kustodiya sa Sasa PNP ang suspek, samtang ang mga biktima ang padayong gitambalan sa Southern Philippines Medical Center.