Mipasalig nga muhatag og tabang ang management sa Rural Transit Mindanao Inc. sa mga pasahero sa usa nila ka unit nga bus nga nalambigit sa head on collission sa Purok 7 Barangay Burnay, Gitagum Misamis Oriental tali sa usa ka fish car.
Gikompirma mismo ni Gitagum Municipal Police Station Chief of Police, Major Dennis Cerilla nga ang RTMI management mismo ang mitawag kaniya nga diha-diha sila nga muhatag og tabang labi na kadtong nakabsan sa kinabuhe, diin lakip nga namatay ang bus driver nga si Robel Pantonial Pagasian.
Kahibaloan nga gawas sa driver sa bus, patay sab ang driver sa fish car nga si Silvino Laping Flores Jr, ug padayon pa nga gi-ila ang tulo pa ka tawo nga dead-on the spot sab sa aksidente.
Una nang migawas sa imbestigasyon nga samtang nagdagan ang bus nga gikan sa Cagayan de Oro padulong sa Iligan City, kalit lamang kini nga gibanggaan sa kasugat nga fish car nga gikan sa Iligan City padulong dinhe sa syudad.
Padayon karon nga gi-imbestigahan ang panghitabo, diin lakip sa gitutukan ang anggolo nga posibling nakatulog ang driver sa nahisgutan nga fish car.
Sa pagkakaron, padayon nga nagpa-alim sa balay tambalanan ang kapin napulo pa ka tawo nga nalambigit sa maduguon nga aksidente sa kadalanan.-END-