GIKUMPERMA sa mga personahe sa hotel sa Gensan nga gipatawag sila ug gi-estorya sa Mayor sa kabahin sa ilang ginasingil nga bayrunon sa ilang serbisyo sa mga na kwarantina unya gipasaligan sila nga sa sulod sa duha hantud tulo ka semana mabayaran na sila apan adunay wala nakatambong sa mao nga meeting gumikan ulahi na nga gipahibalo.
Sa kumpermasyon sa usa ka receptionist nga si Kristine kaniadtong Nobyembre 10 sila gi-imbetahan sa meeting nga anaa ang Mayor, gipaminawan daw sila sa ilang ginasingil nga serbisyo alang sa mga nakwarantina unya gisaaran nga bayaran sa sulod sa duha hangtud sa tulo ka semana lang.
Tungod niini nagapasalamat si Kristine sa pagtuki sa Brigada sa mao nga isyu kay gipaminawan sila sa ilang problema, sa karon niundang na usab sila sa pagdawat og makwarantina.
Samtang sumala usab kay Allan, ulahi na sila gipahibalo nga adunay meeting mao nga wala siya nakatambong nga maoy ginapaadto sa ilang amo sa mga meeting isip marketing officer ug natingala siya niini.
Nakisayod nalang siya sa uban ug nasayran nga nagsaad ang Mayor nga bayaran sila apan duha ka bulan lang ang unang bayaran, alang sa bulan sa Oktubre hangtud Desyembre.
Sa karon padayon ang ilang pagdawat sa makwarantina ug gani okupado ang ilang upat ka kwarto sa unom ka mga tawo.
Tungod sa gisaad sa Mayor nanghinaut si Allan nga matinuod kini kay sa sigi lang sila og hulat sa wala unya dili sila mabayaran sa ilang serbisyo. ( Ver Diazon)