Ku Setyembre 12 eamang, umabot eun sa 70,592 ro numero it mga pumueoyo it probinsiya it Antique nga nabakunahan eun kuntra sa coronavirus disease 2019 (COVID-19). Raya hay 16 porsyento it 432,452 target nga populasyon para sa pagpabakuna.
Base sa datos it Antique Provincial Health Office (APHO), sa numero it mga indibidwal nga nabakunahan, 44,276 ro nakumpleto eun ro daywang dose it bakuna samtang 26,316 man ro nabakunahan it single shot vaccine nga Janssen.
Kaeakip sa mga residente nga nabakunahan hay mga healthcare workers, mga senior citizen, mga indibidwal nga may comorbidities ag mga economic frontliners it probinsiya.
Nagpanawagan man ro lokal nga otoridad sa andang mga pumueoyo nga indi makulbaan nga magpabakuna.
Matandaan nga ku nagtaliwan nga dominggo, ro lokal nga gobyerno it Antique hay nakabaton it 11,000 doses it Sinovac vaccine halin sa national government./JIL B. LACSON