KALIBO, AKLAN—Umapela do Aklan Provincial Drug Enforcement Unit (PDEU) sa mga ginikanan nga i-monitor do social media activities it andang mga inunga agud nga mabantayan do mga raya kontra sa kalakaran it illegal nga droga.
Raya hay kasunod it pagkaaresto it sangka 25 anyos nga eaeaki sa ginpatigayon nga drug buy operation sa Sitio Baybay, Brgy. New Buswang, Kalibo, Aklan.
Suno kay PDEU chief Police Colonel Frensy Andrade, kaabuan sa mga customer it nasambit nga suspek hay pamatan-on ngani nga importanteng i-monitor it mga ginikanan do andang mga unga agud nga indi maeakot sa mga maeain nga impluwensya eabi eon sa mga nagabaligya ag nagagamit it illegal nga droga.
Ginpasiguro man kara nga may pandemiya man ukon owa, nagapadayon do andang hugot nga kampanya kontra sa illegal nga droga sa Aklan.
Kung madumduman, naghana pang pumaeagyo do suspek nga si Ed Ivan Hilario matapos nga matunugan nga pulis do anang katransaksyon kung siin dumaeagan raya paadto sa lugar nga may mga tanom nga bakhawan apang naaresto man eagi it mga operatiba. // SHERRY ANNE REUNIR-VIDAL