LEGAZPI CITY – Pormal nang naglabas ng pahayag kahapon ang alkalde ng Legazpi City na si Geraldine Rosal tungkol sa kanyang kinakaharap na disqualification case na inilabas ng COMELEC 2nd Division dahil sa umano’y paglabag sa spending ban.
Ayon kay Rosal, ipagpapatuloy pa rin niya ang kanyang responsibilidad bilang alkalde ng lunsod kahit mayroong kasong isinampa sa kanya dahil hindi pa naman ito final at executory.
Paglilinaw nito, ang cash assistance ay bahagi ng mga lehitimong programa ng kanilang LGU.
Aniya, ang mga pay-out, na nangyari noong Marso 31 at Abril 2 ng taong ito ay pagpapatuloy lamang ng mga nakaraang batch na inilunsad bago pa man ang campaign period.
Nanindigan ang opisyal na magsasampa ito ng motion for reconsideration sa COMELEC en banc. Kung babalikan, nitong nagdaang buwan, diniskwalipika rin ng COMELEC 1st division ang kanyang asawang si Albay Gov. Noel Rosal dahil sa pagbabawal sa paggastos na kinasasangkutan ng parehong cash assistance program.