Napadpad kilid sa baybayon ang usa ka dakong fishing vessel human gihapak sa dagkong mga balod sa Barangay Tibanban sa Governor Generoso Davao Oriental.
Subay sa report gikan sa Provincial Disaster Risk Reduction and Management Office-Operation Center, walay nadanyos sa maong barko (FB Leeward) nga daling girespondihan sa mga sakop sa Philippine Coast Guard gumikan sa oil spill.
Kahibaluang sukad sa miagi nga adlaw nakasinati ang rehiyon og kusog nga hangin dala sa bagyong Maring nga miresulta usab sa pagkadanyos sa pipila ka mga balay dool sa kabaybayunan sa maong lungsod.
Dugang sa report anaa sa 24 ka panimalay ang partially damaged sa mga munisipyo sa San Isidro ug Governor Generoso samtang 769 ka pamilya sagad anaa nagpuyo dool sa dagat ang gipahikling tungod bahad nga dala sa storm surge apan nakabalik na human gimando sa PDRRMO-Opcen.
Padayon gihapong nakamonitor ang PDRRMO ngadto sa Municipal Disaster Risk Reduction and Management Office sa Governor Generoso ug San Isidro.BNFM-DAVAO
