Arestado ang isa ka miyembro sang Barangay Peacekeeping Action Team (BPAT) matapos gin-implementaran sang search warrant sang mga kapulisan sa Brgy. Tugas, Mambusao, Capiz takna alas 4:45 kahapon sang kaaganhon, Hunyo 21.
Ginkilala ang naaresto kay Danilo Lusanta Luching, 64 anyos residente sang nasambit nga barangay.
Narekober sa paghinakop ni Luching ang yara sa listahan sang search warrant ang
1 unit long barrel type 12 gauge homemade shotgun, 1 magazine sang shotgun, 1 black colored sling bag nga may unod nga 15 ka mga bala sang 12 gauge shotgun kag 1 ka unit sang .38 caliber nga armas luthang.
Dugang nga mga recoveries ang mga masunod:
-1 unit sang colt. 45 caliber pistol nga may serial number 181924
-1 ka sling bag may unod nga 31 ka mga bala sang .45 calilber nga armas luthang
-1 isa ka long barrel type homemade shotgun nga may isa ka magazine.
Ang search warrant ang gin-isyu kag ginpermahan ni Hon. Judith D. Orendain-Tonogbanua, Executive Judge, RTC, Mambusao, Capiz napetsahan Hunyo 19, 2023.
Mahibaluan nga madamo na sang reklamo nga ginpalab-ot sa mga kapulisan nga nagahupot sang nagkalain-lain nga sahi sang armas-luthang si Luching.
Magapangatubang sang kaso nga paglapas RA 10591 ukon Comprehensive Firearms and Ammunition Regulation Act ang nasambit nga tanod. Sa karon, nagapabilin ini sa kustodiya sang Mambusao PNP para sa nagakaigo nga disposisyon. | Judy Ann Juare