ANDAM ang taga Comelec sa pagdawat sa mga sugyot sa mga kandidato alang sa paghan-ay sa common poster areas sa mga barangay alayon sa umaabot nga 2022 national ug local elections.
Sa pahayag ni Election Officer 4 Atty. Anwar Paidumama sumala niini nga andam sila modawat sa mga sugyot sa mga kandidato sa ilang Area of Responsibility kalabot sa common poster areas aron nga maserbisyuhan ang mga botante sa umaabot nga piniliay.
Sumala kay Paidumama nga ang tumong nganong may campaign poster areas aron nga makita ug mailhan sa mga botante ang mga kandidato nga nanagan sa ilang lugar, aron nga makapili ang mga botante sa ilang gustong botaran, aron mailhan ang wala pa mailhan nga kandidato.
Gidugang ni Paidumama nga sa karon wala pa nausab ang ilang talaan sa poster area apan ilaha usab tan-awon ang kasamtangan nga sitwasyon sa mga pampublikong dapit basin adunay mga lugar nga dili na angayan nga butangan og posters.
Subay matud pa sa polisiya sa Comelec atol sa oras sa kampanya ang mga tagbalay nga anaa sa pribadong luna mamahimo usab nga magbutang og poster sibo sa sukod ug lugar nga ginatugot ug wala kini naka-estorbo sa mga kadalanan. ( Ever Diazon)