CEBU CITY –Gipa-alerto sa Cebu City Health Office (CCHO) ang mga residente sa siyudad batok sa sakit nga conjunctivitis o sore eyes.
Matud ni CCHO chief Dr. Daisy Villa, kasagaran nga mukatap ang sore eyes kung init ang panahon, diin posibli na kining masinati tungod sa nagkaduol nga pag-igo sa el ñino.
Hinoon giklaro ni Villa nga dili pa maka-alarma ang natalang kaso sa sore eyes sa dakbayan.
Apan gipa-amping niini ang publiko arun malikayan nga mataptan ug ma-impeksyon sa maong sakit sa mata.
Base sa rekord sa CCHO, adunay natala nga 29 ka kaso sa sore eyes niadtong buwan sa Marso 2023, ug nagpadayon pa ang ilang pagsuta sa kaso niini niadtong Abril ug Mayo.//